Generelt

Tollvesenet stiller krav til både transportørar og avsendar/mottakar ved import/eksport av varesendingar. 



Posten har tollagerbevilling frå Tollvesenet. Ho regulerer alt av ansvar og plikter som Posten må innfri ved import/eksport av alle sendingar som Posten formidlar for sine kundar. I tillegg tilbyr Posten å utføre sjølve fortollinga på vegne av sine kundar.



Kunden pliktar sjølv å gjere seg kjend med regelverket knytt til det å sende og ta imot sendingar frå utlandet. I tillegg må kunden sikre at korrekt dokumentasjon følgjer med sendinga, slik at framsendinga går raskt og rett føre seg.



Toll- og avgiftsfrie sendingar

Sendingar frå utlandet med vareverdi inntil kr 200,- samt gåvesendingar frå privatperson til privatperson med vareverdi inntil kr 1000,-, er toll- og avgiftsfrie med visse unnatak. Forenkla tollhandsaming Alle varesendingar med vareverdi på over kr 200,- må fortollast ved import. Det vil seie at det alltid må betalast meirverdiavgift, medan dei fleste varegrupper er tollfrie. For at fortollinga skal vere så enkel og rimeleg som mogleg, har Posten laga ei forenkla tollhandsamingsløysing for sendingar med verdi mellom kr 200,- og 1000,- til privatpersonar. Denne løysinga er godkjend av Tollvesenet og kan nyttast for dei fleste varer.



Det inneber at:

- Posten reknar ut avgifta på sendinga (i samsvar med tollova) og sender ho vidare til ditt utleveringspostkontor

- Posten sender deg hentemelding med oppgitt beløp som du skal betale ved utleveringa

- Du hentar sendinga på utleveringspostkontoret ditt

- I det du betalar avgifter og pris for forenkla tollhandsaming ved utleveringa har du sjølv tollklarert vara og kan ta ho i bruk

- Posten ordnar med innbetaling av avgifter til Tollvesenet

- Ditt personnummer blir ikkje oppgitt til Tollvesenet ved forenkla tollhandsaming.



Ordinær fortolling

Sendingar med vareverdi over 1000 kroner, med restriksjonar og/eller særavgifter (for eksempel tobakksvarer og alkoholhaldige drikkevarer) må fortollast på vanleg måte, dvs. via Tollvesenet sitt elektroniske system TVINN.



Posten reknar ut avgiftsgrunnlaget for sendinga direkte ved framkomst frå utlandet. Deretter blir sendinga send vidare så snart som mogleg til ditt lokale utleveringskontor. Du gir Posten fortollingsfullmakt i det du betalar oppkravsbeløpet for sendinga og kvitterar for mottak av denne.



Eksportfortolling

For alle pakkeprodukt til utlandet er eksportfortolling inkludert i portoen. Dette gjeld ikkje brevprodukta, så her vil fortollingskostnadar tilkome viss Posten skal eksportfortolle desse for deg.

Mange privatpersonar synest at fortolling av varer både er tungvint og dyrt. Posten har derfor laga ei forenkla tollhandsamingsløysing for sendingar til privatpersonar. Posten si nye løysing er gjort mogleg gjennom ein autorisasjon frå Tollvesenet. Sendingar med restriksjonar, særavgifter (for eksempel tobakksvarer og alkoholhaldige drikkevarer) og med verdi over 1 000 kroner, er unnateke frå ordninga og må fortollast som tidlegare.



Privatimport vareverdi mellom NOK 200 - 1000



Spørsmål 1:

Kva tyder "Forenkla tollhandsaming" for meg?

Svar:

Tollvesenet har innvilga Posten løyve til å forenkle den lovpålagde tollhandsaminga av sendingar til privatpersonar med verdi mellom 200 og 1000 kroner. Dette inneber at:

• du hentar sendinga på utleveringspostkontoret ditt

• du betalar avgifter og forenkla tollhandsamingspris ved utlevering

• du slepp å oppgi fødselsnummeret ditt

• du slepp fordyrande og forseinkande ekstraarbeid 



Spørsmål 2:

Eg meiner at sendinga mi er friteken frå fortolling, sidan dagens valutakurs frå banken tilseier at sendinga har ein verdi under 200 norske kroner. Kvifor har Posten nytta ein annan valutakurs, som medfører at verdien har blitt på over 200 kroner?

Svar:

Ved all fortolling nyttar Tollvesenet ein egen kurs (omrekningskurs) som blir utrekna ut frå Norges Bank sin valutakurs. Omrekningskursen gjeld for ei veke av gongen, og blir som regel offentleggjort torsdagen i veka før. Årsaka til dette er at importørane skal kunne forutsjå kva avgiftene blir når dei skal betale toll og avgifter. Viss du vil sjekke kva fortollingsgrunnlaget for sendinga di blir, må du altså følgje med på omrekningskursane til Tollvesenet, som du til ein kvar tid finn på www.toll.no .



Spørsmål 3:

Vareverdien på sendinga mi er berre litt over 200 kroner inkludert porto. Posten må då forstå at porto ikkje skal reknast med i grunnlaget når den avgiftsfrie grensa på 200 kroner blir vurdert. Kvifor kan ikkje Posten vere litt meir serviceinnstilt og utlevere sendinga mi avgiftsfritt?

Svar:

Posten må forhalde seg til Tollvesenet sitt regelverk og er ikkje gitt moglegheit til å utøve skjønn ved vurdering av den avgiftsfrie grensa på 200 kroner. Ved vurdering av kor vidt ei sending kan utleverast avgiftsfritt eller ikkje, må portoen vere tydeleg spesifisert på fakturaen/forsendingsdokumenta som følgjer med sendinga. Er ikkje portoen spesifisert, så har heller ikkje Posten lov til å trekkje frå denne ved verdifastsetjinga. Viss du vil få sendinga utlevert avgiftsfritt, må du snarast be avsendaren om å sende deg ein faktura som spesifiserer portoen. Dersom du sender denne til Posten i tide, så kan status for sendinga endrast og sendinga kan deretter utleverast avgiftsfritt. For at Posten skal yte den servicen du forventar, må du sjølv forsikre deg om at din avsendar i utlandet spesifiserer portoen på fakturaen/forsendingsdokumenta som følgjer med sendinga.



Spørsmål 4:

Kvifor tek Posten betalt for "Forenkla tollhandsaming"?

Svar:

Prisen dekkjer kostnadane knytt til lovpålagde oppgåver som Posten må utføre: Framkomsthandsaming, registrering av sendinga og pliktig tollagerreknskap overfor Tollvesenet.



Spørsmål 5:

Eg fortollar sendingane mine sjølv i dag. Kan eg dra nytte av forenkla tollhandsaming?

Svar:

Du fortollar no enkelt og greitt ved å nytte den forenkla tollhandsaminga til Posten. I det du betalar og kvitterer for mottak av sendinga, blir ho tollklarert og kan takast i bruk. Du slepp altså fortolling via Internett eller hjå Tollvesenet.



Spørsmål 6:

Er det framleis billegare å fortolle sendingar med verdi 200 - 1000 kroner sjølv?

Svar:

Nei, prisen for eigenfortolling og prisen for forenkla tollhandsaming er den same.



Spørsmål 7:

Kvifor må eg betale moms på denne vara?

Svar:

Du må betale moms på varer du importerer på lik linje med varer du kjøper i Noreg.



Spørsmål 8:

Kvifor må eg betale toll for denne vara?

Svar:

Dei fleste varegrupper er i dag tollfrie. Enkelte varer som klede og sengetøy, produsert utanfor EU, er framleis tollbelagde. Ved forenkla tollhandsaming blir det brukt ein tollsats på 10 % fastsett av Tollvesenet.



Spørsmål 9:

Kan hentefristen forlengast?

Svar:

Nei, sendinga må hentast innan 14 dagar for å unngå at ho blir returnert. 



Spørsmål 10:

Er det nokon varesortar som ikkje er omfatta av forenkla tollhandsaming? Svar:

Unnateke frå ordninga er varer med restriksjonar og særavgifter, f.eks. tobakksvarer og alkoholhaldige drikkevarer. 



Spørsmål 11:

Toll/moms må vere feil utrekna. Kva gjer eg?

Svar:

Vare- og verdioppgiving påført/medsend sendinga dannar grunnlaget for avgiftsutrekninga. Viss du kan dokumentere at verdioppgivinga er feil, og difor krev ny utrekning, kontakt oss straks du får hentemeldinga eller seinast 2 dagar før hentefristen. Du kan ta kontakt med Kundeservice utland på telefon 23 147600 måndag-fredag kl. 08.00 - 16.00.



Spørsmål 12:

Kvar finn eg opplysningar om verdien det er utrekna avgifter av?

Svar:

Utrekningsgrunnlaget er henta frå medsende forsendingsdokument frå avsendar og er oppgitt på fakturaen frå oss. Denne fakturaen ligg ved sendinga, og grunnlaget får du sjå i det du hentar sendinga. Du kan også kontakte oss på telefon 23 147600.



Spørsmål 13:

Kan eg få slike sendingar levert på døra?

Svar:

Du kan bestille tenesta "På Døra" så snart du har motteke hentemelding. Bestilling er rimelegast på posten.no .



Spørsmål 14:

Eg har motteke ei gåvesending frå utlandet som det er utrekna avgifter for. Svar:

Definisjonen på ei gåvesending er at ho må vere frå ein privatperson til deg privat. Med unnatak av enkelte varer, for eksempel alkohol og tobakksvarer, vil det ikkje bli utrekna moms eller andre avgifter på ei gåvesending der verdien av innhaldet er under 1000 kroner.



Spørsmål 15:

Eg har bestilt bøker frå utlandet og må betale moms. Kvifor?

Svar:

Bøker til sluttbrukar er normalt avgiftsfrie. Viss sendinga di inneheld andre varer, som ikkje er spesifisert i tolldokumentasjonen, er det rett at du skal betale moms for alt innhald i sendinga, dvs. også for eventuelle bøker som ho måtte innehalde.



Spørsmål 16:

Eg ønskjer ikkje å hente sendinga som har kome til meg frå utlandet. Må eg betale avgiftene, og kva gjer eg?

Svar:

Nei, du må ikkje betale avgifter. Sendinga blir returnert etter 14 dagar viss du ikkje gjer noko. Vil du at sendinga skal returnerast før 14 dagar har gått, må du skrive "Retur nekta motteke" på hentemeldinga og levere ho til Posten. Sendar vil bli belasta med returporto for pakkar.



Spørsmål 17:

Kvar kan eg få meir informasjon om forenkla tollhandsaming?

Svar:

Du kan kontakte oss på telefon 810 00 710.



Spørsmål 18:

Kvar kan eg få meir informasjon om tollreglar?

Svar:

Informasjon finn du på www.toll.no .

Dersom du ikkje finn svar på spørsmålet ditt, er du velkomen til å kontakte Kundeservice Utland på telefon 23 14 76 00 eller ksutland@posten.no. For generelle tollspørsmål viser vi også til: www.toll.no.



Her er dei vanlegaste spørsmåla.



Spørsmål 1:

Eg meiner at avgiftsutrekninga er feil. Kva gjer eg?

Svar A:

Dersom du meiner at Posten har gjort ein feil, kontakt Kundeservice Utland. Stemmer dette, vil vi sjølvsagt sørgje for å rette opp feilen.

Svar B:

Dersom avgiftsutrekninga er feil, men Posten ikkje kan lastast for dette, har du desse moglegheitene:

▪ Send søknad til din lokale tollstad, og be om ny utrekning av avgiftene. Du må sende med tollpapira som du har fått frå Posten. I tillegg må du forklare kva du meiner er rett avgiftsutrekning og leggje ved dokumentasjon på dette.

▪ Du kan også be Posten om å søkje om ny utrekning av avgiftene for deg. Kontakt Kundeservice Utland. Sjå prislista for Fortolling privat.



Spørsmål 2:

Kvifor må eg gi Posten fullmakt til å fortolle sendinga når eg i andre tilfelle ikkje treng å gi fullmakt?

Svar:

I nokre tilfelle har avsendar betalt fortollingskostnaden og dermed gitt Posten fortollingsfullmakt. Når avsendaren ikkje har betalt fortollingskostnaden, blir denne kostnaden heilt og haldent overleten til importøren. Det inneber at når Posten skal fortolle sendinga, må vi ha ei fortollingsfullmakt frå importøren sidan vi opptrer på vegne av importøren overfor Tollvesenet. Slik fullmakt framgår av utleveringsvedlegget du mottek og må normalt gjevast første gongen du mottek ei slik sending frå Posten .



Spørsmål 3:

Kva skjer når eg gir Posten fortollingsfullmakt?

Svar:

Du godkjenner avgiftsutrekninga som Posten har føreteke, og samstundes gir du Posten løyve til å fortolle dei framtidige sendingane dine som kjem med Posten . Fortollingsfullmakta kan du når som helst trekkje tilbake. Sjå svar på spørsmål 4.



Spørsmål 4:

Kva skjer viss eg ikkje gir Posten fortollingsfullmakt eller tilbakekallar denne?

Svar:

Då må du fortolle sendinga sjølv, vise fram tollkvittering til Posten og betale prisen for Ekspedisjon eigenfortolling før du får utlevert sendinga. Dei framtidige sendingane dine vil då bli lagra inntil du viser fram tollkvittering til Posten . Ver oppmerksam på at du må betale prisen for Ekspedisjon eigenfortolling før du får utlevert sendinga. For detaljar, sjå prisar.