6. november 2026 Julefrimerker

Mange har julepynt av halm i heimen – ein halmkrans på inngangsdøra, ein halmbukk på trappa eller små figurar inne i huset.

Ei av dei mest særmerkte dekorasjonane er julekrona, ein innandørs uro laga av halm. Kunsten å lage julekroner står i dag i fare for å gå i gløymeboka, men fleire kunstnarar og handverkarar har dei siste åra teke tradisjonen opp att. Halmfirkantane på det eine av årets julefrimerke er frå ein kopi av ei julekrone frå Hjartdal frå 1750.

Julenek er kornnek som blir sett ut til fuglane til jul. I motsetnad til mange andre gamle juletradisjonar frå landsbygda har skikken overlevd heilt fram til i dag – både i byane og på landet. På midten av 1800-talet vart juleneket ein del av det romantiske julebiletet som norske kunstnarar bygde opp.
Dompapar i julenek har sidan blitt eit kjært julemotiv og har pryda tusenvis av julekort gjennom generasjonar.