10. oktober 2025 Verdensdagen for psykisk helse

Eit frimerke for psykisk helse  
Verdensdagen for psykisk helse 10. oktober er ein internasjonal FN-dag som blir markert i over 150 land. Han handlar om noko av det viktigaste vi har – openheit, tilhøyrsle og tryggleik i møte med livet. I Noreg har dagen vakse til ein av våre største folkehelsekampanjar, som kvart år samlar tusenvis av skular, arbeidsplassar, organisasjonar og enkeltpersonar til ein felles innsats for psykisk helse.  Målet er enkelt, men kraftfullt: Å gjere det lettare å snakke om det som er vanskeleg, å dele kunnskap, å vise at vi bryr oss – og at vi står saman.  
Kampanjen har aldri vore større. I 2024 vart det registrert over 3 370 markeringar over heile landet – eit tydeleg teikn på at engasjementet er sterkt, og behovet stort. Verdensdagen har blitt ein unik måte å aktivere storsamfunnet på, på tvers av kommunar, sektorar, kulturar, generasjonar og erfaringar.  

Årets tema: Psykisk beredskap  
Årets tema «Vi treng å styrkje vår psykiske beredskap» handlar om korleis vi kan møte livets opp- og nedturar med meir tryggleik, både i det små og når større kriser råkar.  I dag kjenner mange på uro og usikkerheit, både i verda rundt oss og i eigne liv. Det stiller nye krav til korleis vi tek vare på den psykiske helsa vår som enkeltpersonar og som samfunn.  Kampanjen løftar fram enkle råd som gjer ein skilnad: Hald fast på rutinar, søk opp andre, gi hovudet pausar, set grenser, snakk om det. Slike kvardagsgrep kan vere det som held oss oppe eller som gjer at vi klarer å vere der for andre.  

Eit lite frimerke med ein stort bodskap  
Verdensdagen er meir enn ein dato i kalenderen. Den er ei påminning om kor viktig det er å ta vare på oss sjølv og kvarandre – året rundt. Ei invitasjon til å byggje eit samfunn med plass til heile menneske.  I år har Verdensdagen fått sitt eige frimerke. Det er lite i storleik, men stort i tyding. Eit symbol på omtanke, styrke og håp. Ei varm helsing som kan sendast frå éin til ein annan og ei påminning om at vi toler meir når vi står saman.